甲﹕咦﹖讀品大拆家，好難得見到你出場喔﹗
方老師﹕係呀，打機到最後都會見到首領啦。諗住襯考試未黎，畀同學借埋呢批新書嘛﹗
甲﹕啊，我知道今次展出既主要係數學科同宗教科既新書。無論同學想玩數學遊戲、睇下點樣幫份專題研習埋尾、定係想幫心靈增下值，都一樣咁o岩架。
方老師﹕係呀﹗不過除此以外，仲有其他好野喎。例如有幾本講九廣鐵路、香港道路、同香港工業歷史既書添……
甲﹕我都知丫﹗另外有本叫《聽聽屍體怎麼說》既法醫手記、有關中國爆發核戰既預言小說《黃禍》，重有本《看懂食物標籤》o岩晒注重健康既同學﹗
方老師﹕咦﹖你都知好多野喔﹗
甲﹕咁點解你仲要出場既﹖
方老師﹕我出場當然係做「老師好書推介」啦﹗不過今次唔係淨係介紹畀同學，亦都介紹畀老師睇既。近年國外都討論緊「芬蘭奇蹟」，佢地既學生可以放兩個半月暑假、唔使做暑期功課，平日返學又早早放學，連老師都唔使考基準試、又唔會幫學生排名次，但係去到國際學生評估，芬蘭竟然名列第一喎﹗而且學生既學習差異重好細添﹗
甲﹕嘩﹗聽聽下連我都想去芬蘭讀書喎﹗
方老師﹕哈﹗你捱得凍先好喎﹗不過去唔到芬蘭都可以睇下書先，圖書館就買左一個住o係芬蘭既台灣媽媽寫既﹕《沒有資優班》同《每個孩子都是第一名》，重有芬蘭人自己寫既《芬蘭的100個社會創新》。暑期功課你就未必走得甩啦，但係研究下人地點樣做到都好架。
甲﹕咁今次咪連老師都黎搶書﹖
方老師﹕歡迎之至啦﹗各位可以o係呢幾日o黎圖書館睇定先。同學們下星期五就借得啦。
甲﹕如果係圖書館既組員，下星期四放學就借得添﹗
沒有留言:
張貼留言